Y Gweinidog sy'n gyfrifol am Dŷ'r Cwmnïau yw'r Gwir Anrhededdus Michael Fallon AS, Gweinidog Gwladol dros Fusnes a Menter Jo Swinson AS, Is-ysgrifennydd Seneddol Gwladol dros Gysylltiadau Cyflogaeth a Materion Defnyddwyr fydd yn gyfrifol am gyfraith cwmnïau (gan gynnwys Tŷ'r Cwmnïau). Mae gan yr asiantaeth statws Cronfa Fasnachu hefyd, sy'n caniatáu iddi reoli'i chyllid ei hun yn uniongyrchol.
Fel Swyddog Cyfrifeg i'r corff, y Prif Weithredydd sy'n atebol i'r Gweinidogion yn y pen draw am y ffordd y caiff yr asiantaeth ei rhedeg o ddydd i ddydd. Brian Landers yw Cadeirydd Tŷ'r Cwmnïau.
Brian LandersCadeirydd Tŷ'r Cwmnïau
Mae Brian yn aelod o’r Tribiwnlys Apelau Cystadlu ac yn Gomisiynydd Archwilio. Bu gynt yn Ddirprwy Gadeirydd Gwasanaeth yr Ombwdsmon Ariannol, yn Ymddiriedolwr yr Arfdai Brenhinol ac yn Drysorydd Amnesty International yn y DU. Mae ganddo brofiad helaeth ar Fyrddau yn y sector preifat yn y DU a thramor. Ymhlith ei swyddi yn y gorffennol mae swyddi cyllid, gweithredol a rheoli cyffredinol ym meysydd yswiriant, gweithgynhyrchu, ymgynghori ar faterion rheoli, adwerthu, ac yn fwyaf diweddar, cyhoeddi, gan weithio dros enwau cyfarwydd fel Sainsbury’s, W H Smith a Penguin Books. Yn ogystal, fe oedd Cyfarwyddwr Cyllid cyntaf y Gwasanaeth Carchardai. Mae ganddo MBA o Ysgol Fusnes Llundain.
Tim MossCofrestrydd Cwmnïau Lloegr a Chymru, a Phrif Weithredwr Tŷ'r Cwmnïau
Roedd Tim wedi bod yn cyflawni gwaith y Cofrestrydd dros dro ers mis Mawrth 2012, ond fe’i penodwyd i’r swydd yn barhaol ym mis Mawrth 2013. Tim yw’r 31ain Cofrestrydd Cwmnïau mewn olyniaeth faith a ddechreuodd yn ôl yn 1844. Ymunodd Tim â Thŷ'r Cwmnïau yn 2002 a threuliodd yr ychydig flynyddoedd cyntaf yn rhedeg yr adrannau gweithrediadau a chydymffurfio cyn symud i'r rôl Cyfarwyddwr Strategaeth Gorfforaethol. Yn y rôl honno roedd ganddo bortffolio eang o waith sy'n cynnwys strategaeth busnes, polisi corfforaethol, marchnata, archwilio mewnol, cyfathrebu corfforaethol yn ogystal ag arwain y gwaith o symud i gyfeiriad cofrestr hollol electronig a thrawsffurfio'r gwasanaeth. Cyn ymuno â Thŷ'r Cwmnïau, treuliodd ddeuddeg mlynedd mewn swyddi gweithredol uwch yn y diwydiant gweithgynhyrchu. Mae ganddo radd yn y Gwyddorau Natur o Brifysgol Caergrawnt, MBA o Brifysgol Abertawe ac mae'n byw ar fferm yn Ne Cymru.
Ann LewisCyfarwyddwraig Gweithrediadau a Gwasanaeth i Gwsmeriaid
Ymunodd Ann â Thÿ'r Cwmnïau yn 2009, ac mae'n gyfrifol am Weithrediadau Canolog, Gwasanaeth i Gwsmeriaid a Gorfodi.Cyn ymuno â Thÿ'r Cwmnïau, roedd Ann yn Ddirprwy Gyfarwyddwraig gyda' r Swyddfa Ystadegau Gwladol (ONS) yng Nghasnewydd. Treuliodd Ann dros 30 mlynedd yn ONS yn cyflawni amrywiaeth o swyddogaethau, ac mae ganddi brofiad helaeth o gyflwyno a rheoli strategaethau newid o bwys ym myd busnes. Mae Ann wedi rheoli amrywiol dimau mawr yn gwireddu portffolios cymhleth, ac mae'n arbenigo mewn rheolaeth weithredol a hybu newidiadau a gwelliannau effeithlonrwydd ym myd busnes.
Neil HartleyCyfarwyddwr Gwasanaethau Corfforaethol
Ymunodd Neil â Thŷ'r Cwmnïau ym mis Tachwedd 2012. Mae'n gyfrifol am Wasanaethau Corfforaethol sy'n cynnwys AD, TG, cyllid a'r ystadau.Fel cyfrifydd, mae gan Neil brofiad o gyflawni amrywiaeth o swyddogaethau ym maes cyllid, gwasanaethau corfforaethol ac arwain newid. Mae e wedi gweithio mewn nifer o adrannau a chyrff hyd braich, gan gynnwys yr Arolygiaeth Gynllunio, y Comisiwn Cynllunio Seilwaith, Swyddfeydd y Llywodraeth ar gyfer y Rhanbarthau, Cymunedau a Llywodraeth Leol, hen reolydd y diwydiant trydan ac HMRC. Cyn dod i Dŷ'r Cwmnïau, bu Neil yn gweithio ar adolygiad o fodelau busnes newydd ar gyfer swyddogaethau'r Llywodraeth ganol, y broses o gyfuno dau gorff cynllunio cenedlaethol, a rhaglen drawsnewid genedlaethol ar gyfer swyddogaethau cyllid a chaffael Rhwydwaith Swyddfeydd y Llywodraeth.
Craig LesterCyfarwyddwr Anweithredol
Ymunodd Craig â'r Weithrediaeth Gyfranddalwyr ym mis Gorffennaf 2010, ac mae'n arwain ar y Labordy Niwclear Cenedlaethol, y Gronfa Rhwymedigaethau Niwclear a Thŷ'r Cwmnïau (lle mae'n Gyfarwyddwr Anweithredol). Cyn hynny, bu'n arwain tîm Awdurdod Datgomisiynu Niwclear ShEx. Cyn ymuno, bu'n dal gwahanol swyddi Uwch Wasanaeth Sifil ym meysydd polisi, gweithredu a chyflenwi yn Nhrysorlys Ei Mawrhydi a Chyllid a Thollau Ei Mawrhydi, a threuliodd dair blynedd fel Cyfarwyddwr Datblygu Cleientiaid yn Asiantaeth y Swyddfa Brisio, gan arwain ei gwaith ym maes eiddo sy'n ennill ffioedd ar draws y sector cyhoeddus.
Peter WymanAelod Anweithredol y Bwrdd
Mae gan Peter Wyman bortffolio helaeth o benodiadau yn y sectorau preifat a chyhoeddus ac yn y trydydd sector, sy'n cynnwys bod yn Gadeirydd Ymddiriedolaeth Sefydledig Gwasanaeth Iechyd Gwladol Ysbyty Ardal Yeovil, Cadeirydd Sir Richard Sutton's Settled Estates, Cadeirydd Bwrdd Ymgynghorol Pasco Risk Management, Uwch Ymgynghorydd i Albright Stonebridge Group LLC, Cadeirydd Sefydliad Cymunedol Gwlad yr Haf a Thrysorydd Prifysgol Caerfaddon. At hynny, bu Peter yn un o bartneriaid PricewaterhouseCoopers LLP rhwng 1978 a 2010. Ei rôl ddiweddaraf oedd Arweinydd Byd-eang y cwmni dros Bolisi Cyhoeddus a Materion Rheoleiddio. Yn 2002/03 bu Peter yn Llywydd Sefydliad y Cyfrifwyr Siartredig yng Nghymru a Lloegr a bu'n Gadeirydd Pwyllgor Ymgynghorol y Sefydliadau Cyfrifeg hefyd. Yn 2006, enillodd CBE yn anrhydeddau Pen-blwydd y Frenhines am ei wasanaeth i'r proffesiwn cyfrifeg.
Sheila DoyleAelod Anweithredol y Bwrdd
Mae gan Sheila brofiad helaeth ym myd busnes, gan arbenigo mewn rheoli ym maes TG, alinio strategol a chyflwyno rhaglenni cymhleth. Mae hi wedi gweithio mewn sawl swydd uwch, gan weithredu ar fwrdd cwmnïau blaenllaw gan gynnwys BP, IBM a Deutsche Bank. Treuliodd nifer o flynyddoedd yn Hong Kong, Singapore ac Awstralia yn cynghori cwmnïau ariannol a gweithgynhyrchu rhanbarth Asia a'r Môr Tawel. Yn fwy diweddar, penodwyd Sheila yn gyfarwyddwr TG Y Post Brenhinol lle bu'n canolbwyntio ar ddod o hyd i atebion i hwyluso'r gwasanaethau a ddarperir i gwsmeriaid a dod â thechnoleg y busnes i mewn i'r oes ddigidol.
Jeff LynnAelod Anweithredol y Bwrdd
Jeff yw Prif Swyddog Gweithredol a chyd-sylfaenydd Seedrs, un o gwmnïau ariannu trwy gronni cyllid mwyaf blaenllaw'r byd. Fe hefyd yw Cadeirydd cyntaf Cynghrair yr Economi Digidol (Coadec), sefydliad sy'n darparu eiriolaeth ar faterion polisi a rheoliadol ar ran cwmnïau newydd a BBaCh yn y byd digidol. Mae Jeff yn angerddol yn ei gefnogaeth i arloesedd yn y byd digidol ac mae'n credu'n gryf taw'r DU yw'r lle gorau yn y byd i adeiladu busnes byd-eang a thwf uchel heddiw. Cychwynnodd Jeff ei yrfa fel cyfreithiwr corfforaethol, gan ymarfer gyda Sullivan & Cromwell LLP yn Efrog Newydd a Llundain. Mae ganddo MBA a BCL o Brifysgol Rhydychen, JD o Brifysgol Virginia a BA o Brifysgol Pennsylvania.
Mike TaylorAelod Anweithredol y Bwrdd
Mae gan Mike MA Anrh mewn Economeg o Brifysgol Caergrawnt. Cychwynnodd ei yrfa broffesiynol fel Dadansoddwr Ymchwil yn y Ddinas. Cafodd ei ddyrchafu i lefel Cyfarwyddwr gan arwain tîm ymchwil y cyfryngau yn Credit Suisse First Boston. Roedd yn amlwg yn y prif bolau mewnol ac allanol, a chymrodd ran mewn nifer o ymarferion blaenllaw i godi cyfalaf ar gyfer cwmnïau fel BSkyB, Granada Media a'r Thomson Corporation. Gadawodd Mike y Ddinas yn 2003 gan sefydlu Innovise plc. Fel Prif Swyddog Gweithredol cyntaf y cwmni, mae Mike wedi arwain y gwaith o brynu ac ehangu twf Innovise ac mae'r cwmni wedi ennill cydnabyddiaeth am ei dwf cyflym yn y farchnad TG gan ennill cystadleuaeth Fast 50 Deloitte tair gwaith (2010, 2011, 2012) a chystadleuaeth Tech Track y Sunday Times ddwywaith (2011, 2012). Mae Mike yn byw yn Surrey gyda'i wraig a'u dwy ferch.
Prif Fwrdd 
Pwrpas y Prif Fwrdd yw pennu cyfeiriad strategol Tŷ'r Cwmnïau, arwain stiwardiaeth a gwaith llywodraethu cyffredinol yr asiantaeth, sicrhau ein bod ni, fel sefydliad, yn gallu cyflawni ar ran ein cwsmeriaid, ac ymdrin â phenderfyniadau busnes o natur strategol a chyffredinol.
Yn ogystal, mae gofyn i'r Prif Fwrdd gynghori BIS (Yr Adran Busnes, Arloesedd a Sgiliau) a'r gweinidogion mewn perthynas â'r cynllun corfforaethol ac i ba raddau y mae Tŷ'r Cwmnïau yn cyflawni ei swyddogaethau mewn ffordd effeithiol ac effeithlon yn unol â'r Ddogfen Fframwaith, y Cynllun Busnes blynyddol a'r targedau cyhoeddus y mae'r gweinidogion yn eu pennu ar ein cyfer.
Yn benodol, mae'n cynghori ar y strategaethau a gaiff eu mabwysiadu (fel y'u disgrifir yn y Cynllun Busnes), y targedau a gymeradwyir o ran ansawdd ein gwasanaeth a'n perfformiad ariannol, a'r adnoddau sydd eu hangen i gyrraedd y targedau hynny.
Mae'r Prif Fwrdd yn cyfarfod o dan gadeiryddiaeth Cadeirydd Annibynnol. Ymhlith yr aelodau eraill mae'r Prif Weithredwr, Cyfarwyddwyr Tŷ'r Cwmnïau, un o gynrychiolwyr uwch Bwrdd Gweithredol y Budd-ddeiliaid a phedwar NEBM.
Aelodau: Brian Landers, Peter Wyman, Sheila Doyle, Craig Lester, Tim Moss, Ann Lewis, Neil Hartley, Jeff Lynn, Mike Taylor
Pwyllgor Archwilio 
Pwrpas y Pwyllgor Archwilio yw cynorthwyo a chynghori'r Swyddog Cyfrifeg (Y Prif Weithredwr a'r Cofrestrydd) ar faterion archwilio a rheolaeth gorfforaethol. Mae'r Pwyllgor yn gweithredu ar sail ymgynghorol anweithredol hefyd.
Mae'r Pwyllgor yn cynorthwyo'r Prif Fwrdd a'r Swyddog Cyfrifeg (SC) trwy adolygu pa mor gynhwysfawr yw'r gwarantau wrth ddiwallu anghenion gwarantu'r Bwrdd a'r SC, ac yn adolygu dibynadwyedd ac uniondeb y gwarantau hyn.
Mae'r Pwyllgor Archwilio'n cynnwys tri Aelod Anweithredol o'r Bwrdd (sy'n aelodau o'r Prif Fwrdd hefyd), ac mae un o'r rhain yn gweithredu fel Cadeirydd. Mae'r Prif Weithredwr/SC, y Cyfarwyddwr Cyllid, y Pennaeth Gwarantau, Risg ac Ymgynghoraeth (GRY) a chynrychiolydd o'r Swyddfa Archwilio Gwladol (SAG) yn cael gwahoddiad i fynychu'r cyfarfodydd. Gellir gwahodd pobl eraill i fod yn bresennol fel y bo'n briodol hefyd i ddarparu sgiliau arbenigol, gwybodaeth a phrofiad.
Aelodau:Peter Wyman, Sheila Doyle, Craig Lester, Jeff Lynn
Pwyllgor Cyflogau 
Pwrpas y Pwyllgor Cyflogau yw cymeradwyo cylch cyflogau blynyddol Tŷ'r Cwmnïau a chytuno ar y fformwla ar gyfer taliadau o dan y Cynllun Darbodaeth Gorfforaethol sy'n seiliedig ar berfformiad yr asiantaeth yn erbyn ei chyllideb a'i dangosyddion perfformiad allweddol.
Mae gofyn i'r Pwyllgor Cyflogaeth ardystio barn y Tîm Gweithredol am ba mor fforddiadwy yw'r taliadau, neu gyflwyno sylwadau arni, a chyfrannu at ddatblygiad strategaeth cyflogau tymor hwy Tŷ'r Cwmnïau. Yn ogystal, mae'r Pwyllgor yn ymdrin â materion recriwtio staff uwch yn ôl y galw. Mae'r Pwyllgor Cyflogau yn adrodd i'r Prif Fwrdd ar ei weithgareddau a'i ganfyddiadau fel y bo'n briodol.
Ymhlith yr aelodau mae Cadeirydd y Prif Fwrdd, un Aelod Anweithredol arall o'r Bwrdd, y Prif Weithredwr a chynrychiolydd uwch o Fwrdd Gweithredol y Budd-ddeiliaid. Mae Pennaeth Adran AD yr asiantaeth yn mynychu'r cyfarfodydd hefyd.
Aelodau: Brian Landers, Craig Lester, Tim Moss, Sheila Doyle
