Gwybodaeth ar Ddidoli Ceisiadau

Gwybodaeth ar Ddidoli Ceisiadau:

Caiff y broses ddidoli ei chyflawni yn erbyn y meini prawf didoli a bennwyd ar gyfer y swydd. Bydd hyn yn cyd-fynd â’r system sgorio a gaiff ei defnyddio’n gyson trwy gydol y broses. Mae’r panel ddethol yn chwilio am dystiolaeth fod pob ymgeisydd wedi dangos y galluoedd angenrheidiol, a bydd yn cymryd cryfder pob esiampl i ystyriaeth. Caiff y galluoedd craidd eu rhestru yn nhrefn eu pwysigrwydd a bydd hyn yn aros yn gyson trwy gydol y broses ddethol. Defnyddir graddfa pwysoli o 1 i 3, a 3 yw’r pwysicaf:

Hanfodol – pwysoliad o 3
Dymunol – pwysoliad o 2
Manteisiol – pwysoliad o 1

Caiff yr holl alluoedd eu sgorio ar sail graddfa o 6, h.y.:

Tystiolaeth gref – sgôr o 5 neu 6 phwynt
Tystiolaeth dderbyniol – sgôr o 3 neu 4 pwynt
Tystiolaeth wan – sgôr o 1 neu 2 bwynt
Dim tystiolaeth – 0 pwynt

Caiff yr ymgeisydd ei sgorio trwy luosi’r sgôr ar gyfer pwysigrwydd pob gallu a bennwyd (h.y. 1, 2 neu 3) â’r sgôr ar gyfer cryfder pob esiampl a roddwyd (h.y. 1, 2, 3, 4, 5 neu 6).

Bydd y panel cyfan yn trafod sgôr pob ymgeisydd ar ddiwedd pob cam yn y broses ddidoli. Caiff unrhyw wahaniaethau mawr yn y sgoriau unigol eu trafod a’u cyfiawnhau a daw’r panel i gonsensws arnynt. Bydd y panel yn cytuno ar restr fer derfynol o’r ymgeiswyr sy’n bodloni’r gofynion sylfaenol o ran galluoedd ac yn eu gwahodd am gyfweliad.

Llenwi’r Ffurflen Gais

Mae’r ffurflen gais yn rhoi cyfle i chi ddisgrifio’ch addasrwydd ar gyfer y swydd trwy roi enghreifftiau penodol i brofi bod gennych y galluoedd a nodir ym manyleb y swydd. Mae’r ffurflen gais yn cynnwys tair prif adran, sef:-

Manylion Personol

Rhaid llenwi pob adran gan roi gwybodaeth gyfoes amdanoch chi a manylion eich cyflogaeth.

Hanes Gyrfaol

Dyma grynodeb o hanes eich gyrfa, gan ddechrau gyda’ch swydd ddiweddaraf. Dylech gynnwys dyddiadau, teitl y swyddi, eich prif gyfrifoldebau ac yn arbennig unrhyw beth a gyflawnwyd sy’n berthnasol i’r swydd yr ydych chi’n ymgeisio amdani.

Datganiad Personol

Mae’r adran yma’n bwysig iawn. Dyma’ch cyfle chi i ddarparu tystiolaeth sy’n dangos bod gennych chi’r galluoedd allweddol.

Cofiwch: -

Nodi’r galluoedd perthnasol rydych chi’n meddwl eich bod chi wedi eu datblygu a rhoi enghreifftiau o’r ffyrdd rydych chi wedi defnyddio’r galluoedd hyn mewn sefyllfaoedd cyfoes neu yn y gorffennol. Rhowch enghreifftiau perthnasol a chryno o swyddi, tasgau neu brojectau rydych chi wedi eu cyflawni a sut yr aethoch chi ati.
Peidio â rhoi datganiadau syml fel “Rwy’n gyfathrebwr da” heb roi enghraifft o sefyllfa sy’n dangos sut y gwnaethoch chi ddefnyddio’r sgil yma er eich mantais.
Dangos bod gennych chi’r potensial i ddatblygu yn y meysydd lle mae gennych chi lai o brofiad yn hytrach na chyfyngu eich tystiolaeth i’r meysydd lle rydych chi’n teimlo’n fwy profiadol.
Ceisio peidio â mynd y tu hwnt i’r 2 dudalen a ddarparwyd, ond ceisiwch ddefnyddio’r lle sydd ar gael i roi digon o wybodaeth berthnasol i ddangos eich bod chi’n bodloni’r meini prawf ar gyfer y rhestr fer yn yr holl feysydd dan sylw.
Darparu enghreifftiau cryno a hoelio sylw’r panel dethol. Os byddwch chi’n llwyddiannus yn hyn o beth, cewch ddigon o gyfle i ymhelaethu rhagor ar eich sgiliau a’ch gwybodaeth yn y cyfweliad.

Y broses arferol wrth wneud cais am swydd

Gweld hysbyseb am y swydd