 |
|
|
|
|
|
|
Rhyddid Gwybodaeth a Diogelu Data Mae Deddf Rhyddid Gwybodaeth 2000 a Deddf Diogelu Data 1998 yn rhoi’r hawl i bobl weld neu dderbyn gwybodaeth. Mae’r Ddeddf Rhyddid Gwybodaeth yn rhoi’r hawl i’r cyhoedd weld gwybodaeth swyddogol a gedwir gan awdurdodau cyhoeddus gan gynnwys gwybodaeth a gedwir gan Dŷ’r Cwmnïau. Mae’r Ddeddf Diogelu Data yn caniatáu i aelod o’r cyhoedd weld y wybodaeth bersonol a gedwir amdanynt gan sefydliadau o bob math, gan gynnwys Tŷ’r Cwmnïau. Gwybodaeth Swyddogol Daeth y Ddeddf Rhyddid Gwybodaeth i’w llawn rym fis Ionawr 2005. Mae’n rhoi’r hawl i’r cyhoedd gael mynediad at bob math o wybodaeth a gofnodwyd ac a gedwir gan awdurdodau cyhoeddus, a hefyd mae’n nodi’r eithriadau o’r hawl honno. Nod y Ddeddf yw hyrwyddo bod yn agored yn y sector cyhoeddus sy’n cynnwys adrannau’r llywodraeth megis Tŷ’r Cwmnïau. Mae’r Ddeddf yn gymorth i’r cyhoedd ddeall yn well y modd y mae awdurdodau cyhoeddus yn cyflawni’u dyletswyddau, pam y maent yn gwneud eu penderfyniadau, a’r modd y maent yn gwario’u harian. Gwybodaeth Bersonol Mae’r Ddeddf Diogelu Data yn rhoi’r hawl i unigolion gael gwybod pa wybodaeth a gedwir amdanynt, ac yn nodi rheolau i sicrhau yr ymdrinnir â’r wybodaeth honno yn briodol. Mae sefydliadau, gan gynnwys Tŷ’r Cwmnïau, sy’n cadw gwybodaeth bersonol yn gyfrifol am sicrhau bod y wybodaeth yn cael ei defnyddio’n deg, yn cael ei chadw’n ddiogel, yn gywir, ac yn wybodaeth ddiweddaraf. Noder, er bod y Ddeddf Diogelu Data yn diogelu gwybodaeth ‘bersonol’ mae ynddi hefyd eithriadau. Mae Adran 34(c) o’r Ddeddf Diogelu Data yn dweud bod data personol wedi’u heithrio o ddarpariaethau’r Ddeddf ar beidio â datgelu os yw’r data’n cynnwys gwybodaeth y mae rhwymedigaeth ar y rheolydd data, gan neu o dan unrhyw ddeddfiad, i sicrhau ei bod ar gael i’r cyhoedd. Byddai gwybodaeth megis enwau, cyfeiriadau a dyddiadau geni swyddogion cwmnïau’n dod o dan yr eithriad hwnnw oherwydd bod y Ddeddf Cwmnïau’n ei gwneud yn ofynnol i’r Cofrestrydd gadw’r wybodaeth hon a’i darparu trwy’r gofrestr gyhoeddus.
Am ragor o wybodaeth am y Deddfau hyn, ymwelwch â’r safleoedd isod Siarter Wybodaeth Tŷ’r Cwmnïau Mae’r Siarter Wybodaeth hon yn nodi’r safonau y gallwch eu disgwyl gan Dŷ’r Cwmnïau pan fyddwn yn gofyn am wybodaeth neu’n ei chadw, gan gynnwys ond heb fod yn gyfyngedig i ddata personol amdanoch chi. Mae’r siarter yn cynnwys data personol a gwybodaeth arall mae’r Cofrestrydd Cwmnïau’n ei chadw mewn cysylltiad â’i rwymedigaethau o dan y Ddeddf Cwmnïau a deddfwriaeth gysylltiedig. Caiff y Siarter Wybodaeth Tŷ’r Cwmnïau ei hadolygu bob blwyddyn a’i diweddaru i gymryd i ystyriaeth unrhyw newidiadau i’r ddeddfwriaeth. Gwybodaeth Gyhoeddedig Mae Tŷ’r Cwmnïau eisoes yn rhyddhau gwybodaeth fel mater o drefn drwy ei gynnyrch a gwasanaethau, Cynllun Cyhoeddi a rhestr o wybodaeth (a ryddhawyd gynt o dan y Ddeddf Rhyddid Gwybodaeth). Os oes unrhyw wybodaeth nad yw ar gael ar hyn o bryd o dan y dulliau hyn, yna mae gan y cyhoedd yr hawl i ofyn i Dŷ’r Cwmnïau wneud y wybodaeth honno ar gael. Sut mae dod o hyd i wybodaeth?
|
|
