Tÿ'r Cwmnïau

Newidiadau i’r Gofynion o ran Hysbysu am Gydsoddiadau Trawsffiniol

Daw Rheoliadau Cwmnïau (Gofynion Adrodd am Gydsoddiadau a Rhaniadau) 2011 i rym ar 1 Awst 2011. Mae’r Offeryn Statudol hwn yn diwygio Rheoliadau Cwmnïau (Cydsoddiadau Trawsffiniol) 2007.

Mae’r rheoliadau diwygiedig yn cyflwyno cyfleuster newydd a fydd yn galluogi cwmnïau i gyhoeddi telerau drafft cydsoddiad ar wefan. Rhaid i gwmnïau ddarparu hysbysiad i’r perwyl hwn ar ffurflen CB01. Os yw cwmnïau’n dewis peidio â defnyddio’r cyfleuster hwn, rhaid iddynt atodi copi caled o’r telerau drafft wrth y ffurflen gyflawn o hyd.

1. Beth fydd Tŷ’r Cwmnïau yn disgwyl ei gael o 31 Gorffennaf 2011 ymlaen?

• Ffurflen cydsoddi trawsffiniol CB01 gyflawn, sydd naill ai’n cynnwys copi o’r telerau cydsoddi drafft neu’n rhoi cadarnhad bod y telerau drafft ar gael ar wefan.
• Copi o unrhyw orchymyn drafft a wnaed o dan reoliad 11 o Reoliadau Cwmnïau (Cydsoddiadau Trawsffiniol) 2007 sy’n galw cyfarfod o’r aelodau neu’r credydwyr.

Rhaid cyflwyno’r dogfennau hyn i’r Cofrestrydd o leiaf 2 fis cyn dyddiad cyfarfod cyntaf yr aelodau (yn swyddfa Caerdydd ar gyfer Lloegr a Chymru; swyddfa Caeredin ar gyfer yr Alban; a swyddfa Belffast ar gyfer Gogledd Iwerddon).

2. Beth yw’r gofynion wrth gyhoeddi telerau drafft cydsoddiad ar wefan?

Rhaid bodloni’r amodau canlynol:

• Rhaid i’r wefan gael ei chynnal gan neu ar ran y cwmni a rhaid iddi enwi’r cwmni
• Rhaid sicrhau nad oes angen talu ffi i gyrchu’r telerau drafft ar y wefan
• Rhaid i’r telerau drafft aros ar y wefan trwy gydol cyfnod sy’n cychwyn mis cyn dyddiad cyfarfod cyntaf yr aelodau, ac yn dod i ben ar ddyddiad y cyfarfod hwnnw.

I gael rhagor o wybodaeth am Gydsoddiadau Trawsffiniol, cyfeiriwch at y Llyfryn Canllaw GP07