Tÿ'r Cwmnïau

Gweinyddiad i ddatodiad gwirfoddol gan y credydwyr

Adolygiad o achosion lle bo cwmni’n symud o weinyddiad i ddatodiad gwirfoddol gan y credydwyr

Ar gyfer cwmnïau sydd wedi’u cofrestru yn Lloegr a Chymru neu Ogledd Iwerddon

Sylwer: nad yw Rheolau hyn yn berthnasol i’r Alban

Rydym wedi cynnal adolygiad o’n polisi pan fo cwmni’n trosi o weinyddiad i ddatodiad gwirfoddol gan y credydwyr ar Ffurflen 2.34B o dan Baragraff 83(4) o Atodlen B1 o Ddeddf Ansolfedd 1986 neu Baragraff 84(4) o Atodlen B1 o Orchymyn Ansolfedd (Gogledd Iwerddon) 1989.

Beth sydd wedi newid?

Rydym wedi sylweddoli, er bod cwmni’n symud i ddatodiad gwirfoddol gan y credydwyr ar ddyddiad cofrestru Ffurflen 2.34B gan y cofrestrydd cwmnïau, nad yw Ffurflen 2.34B yn hysbysiad am benodi datodydd. Hysbysiad trosi sy’n cynnwys manylion y datodydd arfaethedig yw Ffurflen 2.34B.

Felly mae’n rhaid ffeilio hysbysiad am benodi datodydd (Ffurflen 600 yn Lloegr a Chymru neu Ffurflen VL1 yng Ngogledd Iwerddon) hefyd yn yr achosion hyn, o dan adran 109 o Ddeddf Ansolfedd 1986 neu Erthygl 95 o Orchymyn Ansolfedd (Gogledd Iwerddon) 1989.

Mae’r cyngor hwn yn disodli’r cyngor blaenorol ynglŷn â hysbysiad am benodiad yn y sefyllfa hon.

Pa gamau mae angen i chi eu cymryd?

O heddiw ymlaen dylech gyflwyno hysbysiad am eich penodi’n ddatodydd i’r cofrestrydd ym mhob achos lle bo cwmni’n symud o weinyddiad i ddatodiad gwirfoddol gan y credydwyr. Byddai o gymorth pe bai’r llythyr eglurhaol yn nodi bod y Ffurflen 600 neu'r Ffurflen VL1 yn cael ei ffeilio ar gyfer achos lle mae’r cwmni wedi symud o weinyddiad i ddatodiad gwirfoddol gan y credydwyr.

Os gwelwch yn dda, cyflwynwch yr hysbysiad ar ôl i’r Ffurflen 2.34B gael ei chofrestru oherwydd ni ellir penodi datodydd cyn y dyddiad hwn. Gallwch ddod o hyd i’r dyddiad y trosodd y cwmni i ddatodiad gwirfoddol gan y credydwyr trwy gynhyrchion chwilio Tŷ’r Cwmnïau (h.y. CHD/WebCHeck).

Ni allwn gofrestru hysbysiad am eich penodiad ar gyfer unrhyw gwmni sydd wedi cael ei ddiddymu. Fodd bynnag, os ydych eisiau cyflwyno hysbysiad am eich penodi’n ddatodydd ar gyfer achosion byw, yna byddwn yn derbyn y rhain a’u gosod ar gofnod y cwmni.

Beth mae hyn yn ei olygu i chwilwyr?

Hoffem egluro pa wybodaeth chwilio rydym yn ei chyhoeddi ac o ble y’i cymerir. Mae ein cynhyrchion chwilio’n rhoi’r wybodaeth ganlynol:

• Mae dyddiad diwedd y gweinyddiad, dyddiad peidio â gweithredu fel gweinyddydd a dyddiad dechrau’r datodiad yn cael eu cymryd o’r dyddiad y cofrestrir y Ffurflen 2.34B.
• Mae dyddiad penodi’r datodydd hefyd yn cael ei gymryd o’r dyddiad y cofrestrir y Ffurflen 2.34B, gan fod y datodydd yn dechrau ar ei swydd, yn y rhan fwyaf o achosion, o’r dyddiad mae’r cwmni’n trosi i ddatodiad gwirfoddol gan y credydwyr. Dyma’r dyddiad a fyddai fel arfer yn cael ei gofnodi ar Ffurflen 600/VL1 fel dyddiad penodi datodydd. Mae copi o’r Ffurflen 600/VL1 ar gael am £1 o blith ein cynhyrchion chwilio pe baech eisiau gweld dyddiad gwirioneddol y penodiad ar y ffurflen honno.
• Ar hyn o bryd mae enw a chyfeiriad y datodydd yn cael eu cymryd o fanylion y datodydd arfaethedig ar Ffurflen 2.34B ac yn cael eu dangos ar ein gwasanaethau chwilio fel ‘enw a chyfeiriad yr ymarferydd’.
• Byddwn hefyd yn diweddaru enw a chyfeiriad y datodydd o Ffurflen 600/VL1 fel ‘enw a chyfeiriad yr ymarferydd’ hyd yn oed os yw’r datodydd arfaethedig ar Ffurflen 2.34B a’r datodydd ar Ffurflen 600/VL1 yn union yr un peth. Fodd bynnag, rydym yn bwriadu newid hyn yn y dyfodol agos fel bod y cynhyrchion chwilio’n dangos ‘enw a chyfeiriad yr ymarferydd arfaethedig’ a gymerir o Ffurflen 2.34B ac ‘enw a chyfeiriad yr ymarferydd a benodwyd’ a gymerir o Ffurflen 600/VL1. Byddwn yn cyfathrebu â chi pan gaiff y newidiadau hyn eu gwneud.

Beth fydd yn cael ei gyhoeddi yn y Gazette?

Ni fyddwn yn rhoi hysbysiad yn y London Gazette na’r Belfast Gazette mwyach pan fo Ffurflen 2.34B wedi cael ei chofrestru oherwydd nad oes gofyniad o dan adran 1078 o Ddeddf Cwmnïau 2006 i wneud hynny. Byddwn yn cyfathrebu â chi pan gaiff y newid hwn ei wneud.

Byddwn yn parhau i roi hysbysiad yn y Gazette pan gawn hysbysiad am benodi datodydd, fel sy’n ofynnol gan adran 1078.

Mae’n ofynnol o hyd i ddatodwyr gyhoeddi hysbysiad am eu penodiad yn y Gazette ar Ffurflen 600a ar gyfer cwmnïau Lloegr a Chymru neu Ffurflen VL2 ar gyfer cwmnïau Gogledd Iwerddon.

Ble allaf i gael rhagor o wybodaeth?

Os oes gennych unrhyw ymholiadau yn ymwneud â’r newid polisi hwn, anfonwch hwy at:

Tŷ’r Cwmnïau
Tîm Polisi Ansolfedd
Ffordd y Goron
Caerdydd
CF14 3UZ

enquiries@companieshouse.gov.uk