Tÿ'r Cwmnïau

Newid arfaethedig i’n Gwasanaeth Software Filing (Rhagfyr 2008)

Beth a wnawn? 

Dros y blynyddoedd diwethaf hyn, yr ydym ni yn Nhŷ’r Cwmnïau wedi lleisio’n bwriad i newid trefn dechnegol trosglwyddo data rhwng Cyflwynwyr a Thŷ’r Cwmnïau.

Ym Mehefin 2008, bu inni gyflwyno llwybr newydd sy’n caniatáu anfon dogfennau drwy ryngwyneb gwasanaeth XML (WEB). Mae hyn yn caniatáu i becynnau meddalwedd drosglwyddo data’n uniongyrchol i Dŷ’r Cwmnïau drwy’r Porth XML ar ddiwyg wedi’i amgryptio

Mae Tŷ’r Cwmnïau’n dal i weithredu’r drefn Software Filing ar sail tagiau i gwsmeriaid presennol. Fodd bynnag, rydym yn annog cwsmeriaid i drosi i’r gwasanaeth XML yn gynnar, gan y bydd ffwythianoldeb y gwasanaeth tagiau yn dod i ben ar 1 Hydref 2009.  

Mae’r Porth XML yn cynnig mynediad ar-lein dros y rhyngrwyd i gronfeydd data Tŷ’r Cwmnïau, i gwsmeriaid gyflwyno a hefyd gipio gwybodaeth gwmni drwy gyfrwng eu cymwysiadau neu eu tudalennau gwe eu hun.

Pam y gwnawn hyn? 

Roedd Tŷ’r Cwmnïau am ddatblygu dull cyfathrebu mwy diogel a chynnig i ddefnyddwyr  Software Filing wasanaethau gwe sydd, o ran dylunwaith, yn arfer XML fel diwyg data.  Mae gwasanaeth Software Filing XML yn ffordd fwy effeithlon, ddiogelach a chyflymach o ffeilio manylion cwmni i’r cyflwynydd ac i Dŷ’r Cwmnïau fel ei gilydd, yn hytrach na’r prosesau papur neu e-bost presennol.

Yn ogystal â chyflwyno data, gall cyflwynwyr hefyd gael copi o’r manylion a gedwir ar hyn o bryd gan Dŷ’r Cwmnïau.  Bydd hyn yn cyfateb i’r wybodaeth sydd wedi’i chynnwys ar y Ffurflen Flynyddol ac yn gadael i ddefnyddwyr wirio’r manylion o ran cywirdeb cyn eu hanfon.

Pam nawr?

Pan gyflwynir Deddf Cwmnïau 2006, bydd yn ofynnol trin cyfeiriadau preifat cyfarwyddwyr mewn ffordd ddiogel wedi’i hamgryptio o Hydref 2009 ymlaen. Bydd cyflwyniad system o’r enw Hypertext Transfer Protocol (secure) – HTTPS rhwng y cleient a gweinyddwyr gwe yn bodloni hyn.

Bydd cyflwyno’r gwasanaeth XML y pryd hwn yn rhoi i ddefnyddwyr y drefn Software Filing ddigon o amser i ddatblygu’u systemau a’u pecynnau eu hun a threfnu iddynt fod ar gael i’w cleientiaid.

Mae XML yn safon e-GIF (e-Government Interoperability Framework) yr argymhellir ei harfer yng nghyswllt pob rhyngwyneb llywodraeth dros y we.  Mae e-GIF yn hybu mabwysiadu XML fel prif safon ar gyfer integreiddio a rheoli data o dan bob system sy’n briodol i’r sector cyhoeddus.